【反送中】6.16開咪為遊行人士打氣　港鐵車長：今日唔講日後唔會再有得講

政府提出修訂《逃犯條例》引起極大迴響，其後更一直未有正面回應爭議，200萬+1人為明確表達訴求於6月16日再次上街。當日有港鐵車長開咪為遊行人士打氣，原來開咪是車長思前想後後的決定，擔心風險的同時，他更怕「今日唔講日後唔會再有得講」，所以最終留下令人感動的一幕。

Facebook專頁「反送中窩心小故事」於6月30日發文，表示成功聯絡上其中一位6.16遊行當日開咪為遊行人士打氣的車長，分享當日的經歷及感受：

（車長）我唔係第1個，亦都唔係朝早開咪，我係知道咗有人咁勇之後我先咁做。有兩轉由香港站開出，我都有開咪，詳細時間唔講，大約係6點幾同7點幾嗰陣。7點幾嗰陣散場，人比較多，所以一講完好多人歡呼同拍門，當中亦有旅客問發生咩事，點解會有歡呼同拍手。事後發現有朋友原來坐中我架車，佢話尾卡嘅人都一樣有歡呼同拍手，嗰陣架車已經爆滿，估計當時有大約3000人。

其實所有事情都全因為6月9（編註：應為6月12日）暴力清場，同埋6月15有人死諫，6月16嗰日因為工作同崗位問題，我去唔到遊行，所以我最多只能開咪支持每一個有參與遊行嘅人，佢地每一個人都有份造就出200萬人呢個數字。

決定開咪，固然要考慮自己可能要承擔嘅風險，不過諗到呢度，我覺得如果我仍然選擇當冇事，同醒咗但唔願意出力推倒間密室嘅人有咩分別？冇付出但又想分享成果？我係一個車長，一個好普通好普通嘅香港人，所以就算隔住個駕駛室嚟對住3000人，開口前都好緊張。諗定晒台詞，練習咗幾次，先正式同車廂裡面每一個「200萬+1」人講：「好多謝佢地今日嘅付出，辛苦晒，香港人加油，香港一定贏！」

在昨日的7.1遊行期間，該車長再次透過專頁留言表示，

我身為車長，接載嘅活生生嘅人，摸不著嘅靈魂，恕我無能為力送佢地返屋企。想多謝我地一班喺背後支持你地嘅每一個「200萬人」，報答我地只有1個方法，好好咁活著！以你地嘅有用之驅嚟繼續發言去支持我地嘅行動。

你，絕不孤單；我，亦唔想孤單！

「反送中窩心小故事」為一班年青人所開設，有見近日有不少「香港人不計較付出、互相幫助的事件」，以專頁分享這些「窩心小故事」，散播正能量，同時「不要讓這場運動的點滴淹沒在歷史洪流中」。專頁亦希望香港人能投稿，一同分享自己所見所感的暖心事。

文章獲Facebook專頁「反送中窩心小故事」及當事人授權轉載。